المحاولة الأولي للتدوين الشخصي من سنين، يمكن من أيام الجامعة لما كنت بكتب ورق فيه خواطر وزجل او حتي شوية حاجات كوميدية.
المفترض اني زهقت من محاولة الكتابة بتنمق وبلغة اقرب للفصحي انما هنا عايز اكتب عامية وب حرية شديدة.
حاليا انا في مرحلة غير مفهومة ومتقلب مزاجيا كتير جدا لأسباب كتير. ماما واحشاني طول الوقت تقريبا وبخاف انسي الذكريات معاها.
اخواتي فين؟ لية الناس بتراقب اخواتها وولادهم وهما بيكبروا وانا لا. علاقتي بيهم المتمثلة في مكالمات التليفون بقت مريبة جدا.
كذا مرة وانا بكلمهم ابص في التليفون واقول في سري: لية الناس دي المفروض احبهم اكتر من اي حد تاني؟
بابا عايزني اتجوز بس بسرعة. زمان ( مش زمان قوي يعني ) كنت بتريق في سري علي صمت بابا الدايم تقريبا في البيت لحد ما اكتشفت اني صامت وسخيف جدا زيه بالضبط في حالات كتير.
عايز ارجع اقعد مع الدكتور النفسي تاني بس متضايق برضة من الخطوة دي؛ صحيح ممكن يساعدني في امور عاطفية بس ما اعتقدش هيعجبوا الأفكار المتعلقة بالدين والمجتمع.
أنا مرهق جدا وتعبان طول الوقت.
بحاول انزل اشوف الناس علشان اتبسط ف ما بتبسطش وبرجع تعبان جسدياً اكتر وبالتالي يزيد التعب النفسي.
بقيت طول الوقت عندي حاجات بتعدي من قدام روحي ف تخفيها ف يحصلي خسوف كدة ويفضل جزء بيحاول يفضل منور.
اه الكتابة هنا طلعت لذيذة وتشبه للشتيمة بأريحية قدام حد بتحبه او الخروج بالبوكسر قدام حد ما بتتكسفش منه.
ساعات كتير بقيت بحسد الناس اللي بتبكي بسهولة. مش عارف اعمل كدة خالص وآخر مرة بكيت فيها كانت في السينما وبكيت بحرقة وصوت عالي. أكتر بكتير لما بكيت لما خالتو ماتت.
القراءة هي العزاء الوحيد المستمر لكل يوم تقريبا. الروايات حلوة وبتخليني انسي الحياة. أنا مدمن.
كفاية كدة علي أول مرة.
Comments
Post a Comment